5. Nov, 2014

VIEWS OF SAROJ

Mere Saroj Ke Apne Vichaar

Mere Saroj Devi ki jindgi kahin phoolon sey saji thi to kabhi wo kaanton par bhi chali thi. Jo bhi tha wo apne jindgi aur unke sabhi apne logon sey bahut pyaar karti thi.  Parmaatmaa mein unka vishwaas atal tha. Kai baar jab ham apne lekh karne baithtey thea toh kabhi hamarey lekh kavita ban jaatey thea toh kabhi ham unko kalpit kahani bana detey thea. Jo bhi hota tha wo hamaarey niji vichaar hotey thea. Inhi romaani samay mein meri Saroj ne mujh sey na jaaney kithey hi apne dilki baaton ko bataaya karti thi. Unke ujjwal antar aatmaa mein na jaaney kitney sundar, achhey aur sachhey vichaar bharey rahtey thea. Aaj unke hi karkamalon aur vichaaron sey ham bhi kitna badal gaye hain.

Apne vivah ke chaalis varshgaanth par unhon ne hamse apne pyaarey shabdon mein bataya tha ki wey apne jeewan kaal mein na jaane kitney rishton ko nibhaaney ki koshish karti rahi lekin na jaaney unko aysa kyun lagta tha ki wey apne kisi bhi rishtey ko bhali bhaanti nibha nahi saki thi. Unko iska bahut dukh tha.

Usi samay main ne apney jordaar shabdon mein unko bataya tha ki aysi koi baat nahi hai kyonki wey ek ati uttam putri thi, ek bahut safal vidyarthi thi, ek bhaktimaan sakhi thi, ek pyaari bahen thi, phir ek priyetam patni bani aur jab wey ek mamtaa sey paripurna maa bani toh wey ek behadd bharosey daar naani aaji bhi ban kar apne sabhi naati potton ka dil jeet liya tha. Par mere sabhi aaswaasan ke bawajood bhi meri Saroj ke mann me iss Vishay par bahut maleenta thi jisko wey mere saamney baar baar prakat karti rahi. Mujhe na chahtey huye bhi in sab ko sunna pada tha. Lekin main ne yeh kabhi bhi swikaar nahi kiya ki mere Saroj mein koi bhi khot ya kami thi. Wo paripurna devi toh thi hi par unka mann aur bhavna ati uttam aur mann bhaawan tha.

Meri pyaari Saroj kahti rahi aur main chupchaap suntaa raha aur phir karta bhi kya kyonki unke shabdon mein utni mithaas rahti thi. Unka kahna tha ki jab wey ek paawan aur sulakchhan putri ka farz adaakarti rahi tab unko laga tha ki unke sabhi karkamalon ko kisi ne purey roop sey samajh hi nahi paya tha aur wey ek adhoori beti ban kar rah gayi thi. Unko yeh jaan kar bahut dukh hota tha ki wey apne pujye maata pita ko purey roop sey khush nahi kar saki thi kyun ki unki shaadi ho gayi thi. Wo chah kar bhi apne maa baap ki purey roop sey sewa nahin kar paayeen thi.

Apne shaadi ke baad na toh wey apney saas sasoor ki khushi ban saki aur na hi apne kolej ke priyetam pati ki purey roop sey ardhangni hi ban paayi thi. Unko lagta tha ki wey apne laakh koshishon ke baad bhi ek adhoori patni hi reh gayi thi. Wey apne pati ki sabhi maangon aur chaahaton ki bhali bhaanti purti nahi kar paayi thi thathaa iss ke liye unko bahut dukh dard hota raha hai.

Jab unhon ne apne chaar honhaar bachon ko payda kar ke un ka sahi parwarish kiya tab bhi unko aysa laga ki wey ek achhi maa bhi nahi ban paayi thi. Naani aaji ki to baat chor hi do lekin wey ek safal vidyarthi hote huye bhi apne jeewan mein koi khaas safaltaa nahi paa saki thi. Yeh un ka anumaanit kathan tha jisko main ne kabhi bhi maanney ke liye tayyar nahi tha aur lagataar inkaar karta raha.

Main ne unse shaayad hazaar baar kaha tha ki un ki jeewan mein sabhi bhi safalta aur karam bejodh rahi hain jis ka koi mukabla hi nahi hai. Wey ek ati safal adhyapika thi aur do vishwavidyalayon sey  teen teen digree kar ke sab ko dikha diya tha ki wey kitni hoshiyar aur nipurna vyakti hain. Kai ati uttam high school ki Head of English ka pad safalta purwak nibhaayaa tha aur phir ek senior lecturer ban kar na jaane kitne naye adhyapak adhyapikawon ko tayyar karaaney mein apna sahyog diya tha. In sab aur ayse kitne annye safalta ke namoone sey kewal ek hi matlab nikalta hai ki wey ek ati safar aur honhaar vyakti thi.

Inn sabhi maayushiyon sey unke vajood aur saksiyat par bahut gahera chot pahucha tha tab unhon ne hamse kaha tha ki wey apne jeewan ke kuchh antim ghadiyon mein kewal ek saadharan aurat hi ban kar rahna chahti thi. Unke liye sabhi rishte naate jhoothe aur swarth sey bhare deekhney lage thea. Wey dharma ke sabhi paakhand ki bade jordaar shabdon mein khandan karne lagi thi. Unko wahi log achhe lagtey thea jo sabhi shubh karam kar ke apna jeewan nirwah karte thea. Wey apne jeewan ke antim teen saalon mein sabhi pyaar mohabbat ko banawati samajhne lagi thi aur ek sanyaasani ka roop lekar jee rahi thi. Unke iss vyaktigat ikchha sey ham santusht toh nahi thea par unka kadar karna hamara farz ho gaya tha.

Lekin apne nidhan ke ek do din pahle unhon ne kaha tha ki unka astitwa yahi kahne laga hai ki wey ab ek achhi aurat ka farz bhi nahi adda kar paa rahi thi is liye unko ab iss duniya ko chorney ka samay aa gaya tha. Yeh sab sun kar mere dil aur dimag par jayse bijli gir padi thi par main unko samjhaataa raha ki ayse vichaaron sey koi fayda nahi hoga. Unke dil ke daurey ke baad ham ne unka sewa karna apna farz hi nahi par apna patidharam samjha tha par wey mere sewa karney ke bhav unko achha nahi lagtaa tha.

Jab unhon ne yeh kaha ki ab main kya karoon tab main ne us din bahut laachaar ho ke unse yeh kaha tha ki Darling, aap mein koi khot nahi hai aur kewal mere liye hi nahi par mere sabhi bachchon ke liye aap ek mahaan lakhsmi, maata, aaji, naani hain aur mere liye ek ati sushil aur sundar saubhav ki sati savitri patni rahi ho. Aap mein kabhi bhi koi kami nahi thi, na rahegi kyon ki aap ka sahi roop saraswati devi aur lakhsmi devi se bhi uttam rahi hai. Kami aur khot toh ham mein thi. Mujhe maaf kar dena. Khamoshi aur shaant bhav hi unka sahi latchhan raha hai. Iss liye wey sabhi kuchh sahti rahi aur kabhi kisi sey koi shikaayat hi nahi kiya tha. Wey jayse andar hi andar ghut rahi thi aur ham sab unke antar aatma ka peeda ko pahechaan hi na sakey.

Meri in baton ko sunkar unke chehre par ek vyangaatmak muskaan aa gaya tha aur wey mujhe wahi bhav purna pyaara sa aalingan de kar sone chali gayi thi. Doosre din subah saat baje snaan karne ke baad jab wey mere paas apne kapde pahanney ke liye chali to wey mere baahon me apni dam todd di thi. Main ne kai koshish ki unko sambhalne ke liye par unka dil aur fefada dono thak gaya tha. Ambulance wale aaye aur unko aspataal pahunchaaya par unko koi dawa ya duwa bacha na saki. Brihaspatiwar ke subhah sadhe das baje unka praan pakheroo pramaatma ke supurt ko gya aur ham sab awaak ho ke dekhte rah gaye.

 Main ek damsey bikhar ke tadap ke rah gaya aur aaj bhi unke madhur yaadon ko liye kisi tarah ek jinda laash ki tarah jee raha hoon. Shayad yahi mere pyaar ki saja hai ki main sesh jeewan iss kaid aur aag mein jalta rahoon. Lekin main unke sabhi uttam vichaaron aur sundar thata madhur khayaalon ko le kar apna jeewan bita raha hoon.

Unke jaane ke baad ham ne na jaane kitne kavitayen, lekh aur chalchitr unke naam sey rachey aur banaye hain. Yahi sab mere jeena ka rah dikhate rahe hain aur mere liye duwa aur dawa ka kaam kar rahe hain.

Subah hoti hai, din chadhtaa hai, raat hoti hai par unki yaad mere dil aur dimag sey jaati hi nahi hai. Yahi toh mera sacha pyar hai unke liye aur main apne bache jindgi mein unki hi pooja aur araadhnaa kar ke bitaa doonga.

Log kahte hain ki samay balwaan hai aur dhirey dhirey main unka viyog, judaai, tadap aur bichad jaane ka peeda ko bhool jawunga lekin unko yeh nahi maloom ki main ab apne priyetam Saroj ke aatma ko apne aatma ke andar basa ke jeer aha hoon. Wo ab mere saath hi raheti hain aur main unse wartalaap karta hi rahta hoon. Yahi ab mera jeewan hai. Main apne Saroj ke liye jeeta hoon aur unke hi liye marunga tab mujhko shanti milegi. Mera aur merey Saroj ka purna milan hoga tab hamko mukti milegi.